ಜೀವನ ಸಂಜೆ

ಯಾರ ಜೀವನ ಹೇಗೋ ಏನೋ
ತಿಳಿದುಕೊಳ್ಳಲು ಕಾತರ

ಹೊರಟು ಹೋಗುವ ಮುನ್ನ ಒಮ್ಮೆ
ತಿರುಗಿ ನೋಡಿಕೋ ಒಂದ್ಸಲ
ನೀನು ಮಾಡಿಹ ಕಾರ್ಯ ಕಟ್ಟಳೆ
ತಿಳಿದು ಬರುವುದು ಹಣೆಬರ

ನಿನ್ನ ಜೀವನ ಸಂಜೆ ಹೊತ್ತಲಿ
ಸಮಯ ಸಿಕ್ಕಿದೆ ದುಸ್ತರ
ಮುಳುಗುತಿರುವ ರವಿಯ ಕಂಡು
ಈಗ ಬಂದಿತು ಎಚ್ಚರ

ಮುಗಿದು ಹೋಗಿಹ ಕಥೆಯನೆಂತು
ಮಾಡಬಹುದು ಆರಂಭ
ಮೊದಲೆ ಕೊನೆಯು ತಿಳಿಯುತಿದ್ದರೆ
ಇದ್ದಿಲ್ಲ ಇಂತಹ ಪರಿಸರ

ನನ್ನ ನಿನ್ನಯ ಮಾತು ಇಲ್ಲಿ
ಕಾಲಕ್ಷೇಪದ ಹರಟೆಯು
ಸುಮ್ಮನಿಲ್ಲಿಯೆ ನಿಂತು ನೋಡುತ
ಕಾಲಹರಣ ನಿರಂತರ

ತಿಳಿದೋ ತಿಳಿಯದೆ ಮಾಡಿದಂತಹ
ಪುಣ್ಯ ಕೆಲಸಗಳೆಲ್ಲವೂ
ನಿನ್ನನಿಂದು ತಂದು ನಿಲಿಸಿದೆ
ಪುಣ್ಯಲೋಕದ ದ್ವಾರದಿ